ವರುಷದ ಕಂದಮ್ಮ

ಮನೆಯ ಬೆಳಗಿದ ದೀಪಕೆ

ಮನವ ತಣಿಸುವ ಮೂರ್ತಿಗೆ

ನಮ್ಮ ಮನೆಯ ಪುಟ್ಟ ರತಿಗೆ

ವರುಷವಾಯಿತು ಇಂದಿಗೆ

ತನುವ ಕುಣಿಸಿ ಅತ್ತು ಕಾಡಿಸಿ

ನಮ್ಮ ಮಣಿಸಿ ಮುತ್ತು ಪೋಣಿಸಿ

ಸರವ ಧರಿಸಿದ ಮುಗುಧೆಗೆ

ವರುಷವಾಯಿತು ಇಂದಿಗೆ

ಮಿಂಚಿನಂತೆ ಹೊಳೆಯುತಿರುವ

ಸಂಚಿನಲ್ಲೇ ನಮ್ಮ ಸೆಳೆವ

ನಮ್ಮ ಮನೆಯ ಮಿಂಚುಳ್ಳಿಗೆ

ವರುಷವಾಯಿತು ಇಂದಿಗೆ

ಹರುಷ ಸುರಿಸುವ ಕಂದಗೆ

ಹೊಣೆಯ ಕಲಿಸಿದ ಬಾಲೆಗೆ

ನಮ್ಮ ಮನೆಯ ಚಾರುಲತೆಗೆ

ವರುಷವಾಯಿತು ಇಂದಿಗೆ

ನಮ್ಮ ಬಾಳಿನ ಗ್ರಂಥವ

ತನ್ನ ಹೆಸರಲಿ ಬರೆಯುತಿರುವ

ಈ ಪುಟ್ಟ ಕೃತಿಕರ್ತೃವಿಗೆ

ವರುಷವಾಯಿತು ಇಂದಿಗೆ

..- ಶ್ರೀಮತಿ ಶುಭಶ್ರೀ. ಜಿ. ಬೆಳಂದೂರ. ಡೆಲ್‌ವೇರ್, ಕೊಲೆರಾಡೊ, ಯು.ಎಸ್.ಏ.

((ನಮ್ಮ ಮಗಳು ಸೌದಾಮಿನಿಗೆ ಒಂದು ವರುಷ ತುಂಬಿದ ಸಂದರ್ಭದಲ್ಲಿ ಬರೆದ ಕವನ))