ಅರಿವಿನ ಮಾರಿತಂದೆ -2

ಅಂಧಕಾರವೆಂಬ ಮನೆಯ ಬಾಗಿಲಲ್ಲಿ ಆರಂಗದ ಕರಡಿ ಕಟ್ಟಿ
ಮೂರಂಗದ ಕೋಡಗ ಏಡಿಸಿ ಕಾಡುತ್ತಿದೆ.
ಮೀರಿದೆನೆಂಬವರೆಲ್ಲರು ಕರಡಿಯ ಗಿಲಗಿನಲ್ಲಿ ಸತ್ತು,

ಕೋಡಗದ ಚೇಷ್ಟೆಯಲ್ಲಿ ಸಿಕ್ಕಿ,
ಬೇಡ ನಿಮಗೆ ಆರೂಢದ ಮಾತು.
ಇಂತಿವ ಮೀರಿ ಅರಿದವಂಗಲ್ಲದೆ ಸದಾಶಿವಮೂರ್ತಿಲಿಂಗವಿಲ್ಲ.

                                                          -------->  ಅರಿವಿನ ಮಾರಿತಂದೆ

ಅರಿವಿನ ಮಾರಿತಂದೆ -1

ಅಂಕಿತ ನಾಮ: ಸದಾಶಿವ ಮೂರ್ತಿಲಿಂಗ

ಕಾಲ: 1160

ದೊರಕಿರುವ ವಚನಗಳು: 309 (ಆಧಾರ: ಸಮಗ್ರ ವಚನ ಸಂಪುಟ)

ತಂದೆ/ತಾಯಿ: ......

ಹುಟ್ಟಿದ ಸ್ಥಳ: .......

ಪರಿಚಯ: ಕಾಲ, ಸು. 1160. 

                ಅರಿವಿನ ಸ್ವರೂಪದ ಚರ್ಚೆ ಈತನ ಮುಖ್ಯ ಆಸಕ್ತಿ. ಈತನ 309 ವಚನಗಳು ದೊರೆತಿವೆ. ಗುರು, ಲಿಂಗ, ಜಂಗಮ ಮೊದಲಾದ ಪಾರಿಭಾಷಿಕಗಳ ಅರ್ಥವನ್ನು ಕುರಿತ ಚಿಂತನೆ ಈತನಲ್ಲಿದೆ. ಅನೇಕ ರಚನೆಗಳು ಬೆಡಗಿನ ವಚನಗಳ ರೂಪದಲ್ಲಿವೆ. 

 

ಅನುವನರಿವನ್ನಕ್ಕ ಅರ್ಚನೆ, ಪುಣ್ಯವನರಿವನ್ನಕ್ಕ ಪೂಜೆ,
ಶರೀರವುಳ್ಳನ್ನಕ್ಕ ಸುಖದುಃಖವ ಸಂತಾಪಿಸಬೇಕು.
ತೆಪ್ಪದಲ್ಲಿ ನಿಂದು ಒತ್ತಿ ಹೊಳೆಯ ದಾಟುವಂತೆ.
ಕ್ರೀಶುದ್ಧವಾದಲ್ಲಿ ಜ್ಞಾನದ ಗೊತ್ತು,
ಸದಾಶಿವಮೂರ್ತಿಲಿಂಗವನರಿವುದಕ್ಕೆ.

                                                                          -------> ಅರಿವಿನ ಮಾರಿತಂದೆ

ಸಣಿಕೆ ನೊಣ ಹಿಡುಕ

ಪಕ್ಕದ ಮನೆ

= ಇದು ಇರುವವರೆಗೆ ಹಲವರಿಗೆ ಸುಖ ಶಾಂತಿ ಇಲ್ಲ

= ಹೆಂಡತಿಯ ಹೊಸ ಹೊಸ ಬಯಕೆಗಳು ಹುಟ್ಟುವುದರ ಮೂಲ ಸ್ರೋತ

= ನಮ್ಮ ಮನೆಗೆ ತರಿಸುವ ಪತ್ರಿಕೆಗಳ ನಿಷ್ಠಾವಂತ ಓದುಗರಿರುವ ಮನೆ

= ನಮ್ಮ ಮನೆಯ ಅಭಿವೃದ್ಧಿಗೆ/ ಅಧಃಪತನಕ್ಕೆ ಇದರ ಕೊಡುಗೆ ಅಧಿಕ

= ಕೆಲವರು ಎಲ್ಲ ಸಹಾಯಕ್ಕೂ ಪಕ್ಕಾಗುವ ಮನೆಅಕ್ಕದ ಮನೆಗೆ ಅತಿಥಿಗಳು ಬಂದರೆ ಪಕ್ಕದ ಮನೆಯವರಿಗೆ  ಚಹಾಪುಡಿ ಮತ್ತು ಸಕ್ಕರೆ ಖರ್ಚು

= ಪಕ್ಕದ ಮನೆಯವರನ್ನು ಚೆನ್ನಾಗಿಟ್ಟುಕೊಂಡರೆ ನಮಗೇ ಕ್ಷೇಮ. ಅನ್ಯಥಾ ಸುಖ ಸಮೃದ್ಧಿಗೆ ಕ್ಷಾಮ 

= ಕೆಲವೊಮ್ಮೆ 'ನೆರೆ', ಇನ್ನು ಕೆಲವೊಮ್ಮೆ 'ಹೊರೆ'

= ಕೆಲವೊಮ್ಮೆ ಶತ್ರುಮನೆ. ಇನ್ನು ಕೆಲವೊಮ್ಮೆ ಮಿತ್ರರಂತೆ ನಟಿಸುವವರು ಇರುವ ಮನೆ

= ಮನೆಯೇ ಮಂತ್ರಾಲಯ, ನೆರೆಮನೆಯೇ ಮಂಥರಾ ಆಲಯ

= ಯಾವ ಅಂಗಡಿಯಲ್ಲಿ ಯಾವ ಆಫರ್ ಬಂದಿದೆ ಎಂದು ತಿಳಿಸುವ ಸುದ್ದಿಮನೆ

= ಇವರನ್ನು ಚೆನ್ನಾಗಿ ಇಟ್ಟುಕೊಳ್ಳಬೇಕು. ಮನೆಯ ವಸ್ತುಗಳು ಸುರಕ್ಷಿತವಾಗಿರಬೇಕೆಂದರೆ.....

ಕೃಪೆ-ವಿಶ್ವನಾಥ ಸುಂಕಸಾಳ